ໜັງສືພິມ Vietnam Express ລາຍງານໃນວັນທີ 23 ມັງກອນນີ້ວ່າ ຍອດຂາຍອະສັງຫາລິມະສັບ ແລະ ຍອດຂາຍເຊົ່າອາພາດເມັນຂອງຫວຽດນາມຫຼຸດລົງຢ່າງຫຼວງຫຼາຍໃນຊ່ວງເຄິ່ງທຳອິດຂອງປີນີ້.

ອີງຕາມລາຍງານ, ການແຜ່ລະບາດຂອງພະຍາດປອດອັກເສບຊະນິດໃໝ່ໃນຂອບເຂດກ້ວາງໄດ້ສົ່ງຜົນກະທົບຕໍ່ປະສິດທິພາບຂອງອຸດສາຫະກຳອະສັງຫາລິມະສັບທົ່ວໂລກ. ອີງຕາມລາຍງານຂອງ Cushman & Wakefield, ບໍລິສັດບໍລິການອະສັງຫາລິມະສັບຫວຽດນາມ, ໃນຊ່ວງເຄິ່ງທຳອິດຂອງປີນີ້, ຍອດຂາຍອະສັງຫາລິມະສັບໃນຕົວເມືອງໃຫຍ່ໆໃນຫວຽດນາມຫຼຸດລົງ 40% ຫາ 60%, ແລະ ຄ່າເຊົ່າເຮືອນຫຼຸດລົງ 40%.

ຜູ້ອຳນວຍການຝ່າຍບໍລິຫານຂອງບໍລິສັດ ທ່ານ Alex Crane ກ່າວວ່າ “ຈຳນວນໂຄງການອະສັງຫາລິມະຊັບທີ່ເປີດໃໝ່ໄດ້ຫຼຸດລົງຢ່າງຫຼວງຫຼາຍເມື່ອທຽບກັບໄລຍະດຽວກັນຂອງປີກາຍ, ໂດຍນະຄອນຫຼວງຮ່າໂນ້ຍຫຼຸດລົງ 30% ແລະ ນະຄອນໂຮ່ຈິມິນຫຼຸດລົງ 60%. ໃນຊ່ວງເວລາທີ່ເສດຖະກິດມີຄວາມຫຍຸ້ງຍາກ, ຜູ້ຊື້ມີຄວາມລະມັດລະວັງຫຼາຍຂຶ້ນກ່ຽວກັບການຕັດສິນໃຈຊື້.” ລາວເວົ້າວ່າ, ເຖິງແມ່ນວ່າຜູ້ພັດທະນາຈະສະເໜີນະໂຍບາຍພິເສດເຊັ່ນ: ເງິນກູ້ທີ່ບໍ່ມີດອກເບ້ຍ ຫຼື ການຂະຫຍາຍເງື່ອນໄຂການຊຳລະ, ແຕ່ຍອດຂາຍອະສັງຫາລິມະຊັບບໍ່ໄດ້ເພີ່ມຂຶ້ນ.

ຜູ້ພັດທະນາອະສັງຫາລິມະຊັບລະດັບສູງໄດ້ຢືນຢັນວ່າການສະໜອງເຮືອນໃໝ່ໃນຕະຫຼາດຫວຽດນາມຫຼຸດລົງ 52% ໃນຫົກເດືອນທຳອິດ, ແລະ ຍອດຂາຍອະສັງຫາລິມະຊັບຫຼຸດລົງ 55%, ເຊິ່ງເປັນລະດັບຕໍ່າສຸດໃນຮອບຫ້າປີ.

ນອກຈາກນັ້ນ, ຂໍ້ມູນຂອງ Real Capital Analytics ສະແດງໃຫ້ເຫັນວ່າໂຄງການລົງທຶນໃນອະສັງຫາລິມະສັບທີ່ມີມູນຄ່າການລົງທຶນຫຼາຍກວ່າ 10 ລ້ານໂດລາສະຫະລັດໄດ້ຫຼຸດລົງຫຼາຍກວ່າ 75% ໃນປີນີ້, ຈາກ 655 ລ້ານໂດລາສະຫະລັດໃນປີ 2019 ມາເປັນ 183 ລ້ານໂດລາສະຫະລັດ.