សារព័ត៌មាន Vietnam Express បានរាយការណ៍នៅថ្ងៃទី ២៣ ថា ការលក់អចលនទ្រព្យ និងការជួលអាផាតមិនរបស់ប្រទេសវៀតណាមបានធ្លាក់ចុះយ៉ាងខ្លាំងនៅក្នុងឆមាសទីមួយនៃឆ្នាំនេះ។

យោងតាមរបាយការណ៍ ការរីករាលដាលទ្រង់ទ្រាយធំនៃជំងឺរាតត្បាតជំងឺរលាកសួតប្រភេទថ្មីបានប៉ះពាល់ដល់ដំណើរការនៃឧស្សាហកម្មអចលនទ្រព្យពិភពលោក។ យោងតាមរបាយការណ៍របស់ក្រុមហ៊ុន Cushman & Wakefield ដែលជាក្រុមហ៊ុនផ្តល់សេវាកម្មអចលនទ្រព្យវៀតណាម ក្នុងឆមាសទីមួយនៃឆ្នាំនេះ ការលក់អចលនទ្រព្យនៅក្នុងទីក្រុងធំៗក្នុងប្រទេសវៀតណាមបានធ្លាក់ចុះពី ៤០% ទៅ ៦០% ហើយថ្លៃជួលផ្ទះបានធ្លាក់ចុះ ៤០%។

លោក Alex Crane នាយកគ្រប់គ្រងក្រុមហ៊ុនបានមានប្រសាសន៍ថា “ចំនួនគម្រោងអចលនទ្រព្យដែលទើបបើកថ្មីបានធ្លាក់ចុះគួរឱ្យកត់សម្គាល់បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដោយទីក្រុងហាណូយធ្លាក់ចុះ 30% និងទីក្រុងហូជីមិញធ្លាក់ចុះ 60%។ នៅក្នុងគ្រាលំបាកផ្នែកសេដ្ឋកិច្ច អ្នកទិញមានការប្រុងប្រយ័ត្នជាងមុនអំពីការសម្រេចចិត្តទិញ”។ លោកបានមានប្រសាសន៍ថា ទោះបីជាអ្នកអភិវឌ្ឍន៍ផ្តល់ជូនគោលនយោបាយអនុគ្រោះដូចជាប្រាក់កម្ចីគ្មានការប្រាក់ ឬការពង្រីកលក្ខខណ្ឌទូទាត់ក៏ដោយ ការលក់អចលនទ្រព្យមិនបានកើនឡើងទេ។

ក្រុមហ៊ុនអភិវឌ្ឍន៍អចលនទ្រព្យលំដាប់ខ្ពស់មួយបានបញ្ជាក់ថា ការផ្គត់ផ្គង់ផ្ទះថ្មីនៅក្នុងទីផ្សារវៀតណាមបានធ្លាក់ចុះ ៥២% ក្នុងរយៈពេលប្រាំមួយខែដំបូង ហើយការលក់អចលនទ្រព្យបានធ្លាក់ចុះ ៥៥% ដែលជាកម្រិតទាបបំផុតក្នុងរយៈពេលប្រាំឆ្នាំ។

លើសពីនេះ ទិន្នន័យរបស់ Real Capital Analytics បង្ហាញថា គម្រោងវិនិយោគអចលនទ្រព្យដែលមានចំនួនទឹកប្រាក់វិនិយោគលើសពី ១០ លានដុល្លារអាមេរិក បានធ្លាក់ចុះជាង ៧៥% នៅឆ្នាំនេះ ពី ៦៥៥ លានដុល្លារអាមេរិក ក្នុងឆ្នាំ ២០១៩ មកត្រឹម ១៨៣ លានដុល្លារអាមេរិក។