இந்த ஆண்டின் முதல் பாதியில் வியட்நாமின் ரியல் எஸ்டேட் விற்பனையும், அடுக்குமாடி குடியிருப்பு குத்தகை வர்த்தகமும் கடுமையாகச் சரிந்துள்ளதாக வியட்நாம் எக்ஸ்பிரஸ் 23ஆம் தேதி செய்தி வெளியிட்டுள்ளது.

அறிக்கைகளின்படி, புதிய கொரோனா வைரஸ் நிமோனியா தொற்றுநோய் பெரிய அளவில் பரவியது உலகளாவிய ரியல் எஸ்டேட் துறையின் செயல்பாட்டைப் பாதித்துள்ளது. வியட்நாமிய ரியல் எஸ்டேட் சேவை நிறுவனமான குஷ்மேன் & வேக்ஃபீல்டின் அறிக்கையின்படி, இந்த ஆண்டின் முதல் பாதியில், வியட்நாமின் முக்கிய நகரங்களில் சொத்து விற்பனை 40% முதல் 60% வரை குறைந்துள்ளது, மேலும் வீட்டு வாடகையும் 40% சரிந்துள்ளது.

நிறுவனத்தின் நிர்வாக இயக்குநர் அலெக்ஸ் கிரேன் கூறுகையில், “கடந்த ஆண்டின் இதே காலகட்டத்துடன் ஒப்பிடுகையில், புதிதாகத் தொடங்கப்பட்ட ரியல் எஸ்டேட் திட்டங்களின் எண்ணிக்கை கணிசமாகக் குறைந்துள்ளது. ஹனோயில் 30% மற்றும் ஹோ சி மின் நகரில் 60% சரிவு ஏற்பட்டுள்ளது. பொருளாதார நெருக்கடி காலங்களில், வாங்குபவர்கள் கொள்முதல் முடிவுகளில் அதிக எச்சரிக்கையுடன் இருக்கிறார்கள்.” என்றார். மேலும் அவர், “கட்டுமான நிறுவனங்கள் வட்டியில்லா கடன்கள் அல்லது தவணை செலுத்தும் காலத்தை நீட்டித்தல் போன்ற சலுகைக் கொள்கைகளை வழங்கினாலும், ரியல் எஸ்டேட் விற்பனை அதிகரிக்கவில்லை,” என்றும் கூறினார்.

வியட்நாம் சந்தையில் புதிய வீடுகளின் வழங்கல் முதல் ஆறு மாதங்களில் 52% சரிந்துள்ளதாகவும், ரியல் எஸ்டேட் விற்பனை 55% சரிந்து, கடந்த ஐந்து ஆண்டுகளில் இல்லாத அளவுக்குக் குறைந்துள்ளதாகவும் ஒரு உயர்தர ரியல் எஸ்டேட் நிறுவனம் உறுதிப்படுத்தியுள்ளது.

மேலும், ரியல் கேப்பிட்டல் அனலிட்டிக்ஸ் தரவுகளின்படி, 10 மில்லியன் அமெரிக்க டாலருக்கும் அதிகமான முதலீட்டுத் தொகை கொண்ட ரியல் எஸ்டேட் முதலீட்டுத் திட்டங்கள், 2019-ல் 655 மில்லியன் அமெரிக்க டாலராக இருந்த நிலையில் இருந்து, இந்த ஆண்டு 183 மில்லியன் அமெரிக்க டாலராக, 75%க்கும் மேலாகச் சரிந்துள்ளன.